
Pedagogika fanlari falsafa doktori (PhD), dotsent, kafedra mudiri.
2025-2026-o'quv yilida Kafedrada 27 nafar professor-o‘qituvchi mavjud, shundan 20 nafari asosiy shtatda faoliyat ko‘rsatadi. Kafedrada 2 nafar dotsent (D. Shabbazova, U. Muminova), 4 nafar pedagogika fanlari bo‘yicha falsafa doktori — PhD (S. Tursunova, Z. Abdunazarova, X. Jumayev, S. Xurramova), 2 nafar katta o‘qituvchi (D. Azimova, A. Xabibulloyev), 14 nafar o‘qituvchi hamda 7 nafar o‘rindosh o‘qituvchi faoliyat yuritib kelmoqda. Kafedraning ilmiy salohiyati 25 foizni tashkil etadi.
Bugungi kunda kafedra 60110400 — Boshlang‘ich ta’lim bakalavriat yo‘nalishi (o‘zbek, rus va tojik tillarida) hamda 70110400 — Ta’lim va tarbiya nazariyasi va metodikasi magistratura yo‘nalishi (o‘zbek va rus tillarida) uchun boshlang‘ich ta’lim mutaxassislik fanlarini o‘qitish bilan shug‘ullanadi.
Boshlang‘ich ta’lim (bakalavr): o‘zbek, rus va tojik tillarida.
Ta’lim va tarbiya nazariyasi va metodikasi (magistratura): o‘zbek va rus tillarida.
Boshlang‘ich ta’lim yo‘nalishidagi mutaxassislik fanlarini zamonaviy metodika asosida o‘qitish.
2025-2026-o'quv yilida Boshlang‘ich ta’limda matematika va ona tili kafedrasi xorijiy oliy ta’lim muassasalari bilan o‘zaro manfaatli va barqaror hamkorlikni rivojlantirishni o‘zining muhim vazifalaridan biri sifatida belgilaydi. Mazkur hamkorlik boshlang‘ich ta’lim sohasida ta’lim sifati va ilmiy salohiyatni yuksaltirishga, shuningdek, xalqaro tajribalarni ta’lim jarayoniga samarali tatbiq etishga qaratilgan.
Hamkorlik doirasida professor-o‘qituvchilar va talabalarning akademik mobilligini yo‘lga qo‘yish, qisqa muddatli stajirovkalar, malaka oshirish dasturlari hamda akademik almashinuvlarni tashkil etish rejalashtirilgan. Shu bilan birga, boshlang‘ich ta’lim, matematika va ona tilini o‘qitish metodikasi bo‘yicha qo‘shma ta’lim dasturlari, o‘quv-metodik materiallar hamda innovatsion loyihalarni ishlab chiqishga alohida e’tibor qaratiladi.
Ilmiy hamkorlikni mustahkamlash maqsadida qo‘shma tadqiqotlar olib borish, xalqaro ilmiy konferensiyalar, seminarlar va vebinarlarni tashkil etish, yuqori reytingli ilmiy jurnallarda hammualliflikda maqolalar nashr etish hamda ilmiy grant loyihalarida ishtirok etish ko‘zda tutilgan. Bu esa kafedra ilmiy faoliyatining xalqaro darajadagi nufuzini oshirishga xizmat qiladi.
Zamonaviy pedagogik texnologiyalar, raqamli ta’lim resurslari va sun’iy intellektga asoslangan o‘qitish vositalarini o‘rganish hamda ularni boshlang‘ich ta’lim amaliyotiga joriy etish ham hamkorlikning muhim yo‘nalishlaridan hisoblanadi. Shuningdek, masofaviy ta’lim imkoniyatlarini kengaytirish, qo‘shma onlayn kurslar va ochiq ta’lim platformalarini yaratish orqali talabalar uchun xalqaro ta’lim muhitini shakllantirish rejalashtirilgan.
Kafedra xorijiy hamkorlar bilan milliy va jahon pedagogik tajribasini o‘zaro boyitish, matematika va ona tili ta’limi metodikasi bo‘yicha ilg‘or yondashuvlarni o‘rganish, shuningdek, madaniy-ma’rifiy tadbirlar va akademik muloqotlarda faol ishtirok etishga alohida ahamiyat qaratadi. Xalqaro hamkorlikni izchil rivojlantirish kafedraning ta’lim, ilmiy-tadqiqot va innovatsion faoliyatini yangi bosqichga olib chiqish, raqobatbardosh pedagog kadrlar tayyorlash hamda institutning xalqaro ta’lim makonidagi mavqeini yanada mustahkamlashga xizmat qiladi.





























Guliston davlat universiteti huzuridagi ilmiy darajalar beruvchi PhD.03/27.02.2020.Fil.91.02 raqamli Ilmiy kengashda “Alisher Navoiyning «Mahbub ul-qulub» asari leksikasi” mavzusida 10.00.01 — O‘zbek tili ixtisosligi bo‘yicha filologiya fanlari bo‘yicha falsafa doktori (PhD) dissertatsiya ishini 2024-yil 14-sentyabrda muvaffaqiyatli himoya qildi. Diplom № 015554, 30.11.2024.

Termiz davlat universiteti huzuridagi ilmiy darajalar beruvchi PhD.03/30.12.2019.Ped.78.03 raqamli Ilmiy kengashda “Ona tili darslarida mnemik jarayonlarni rivojlantirish metodikasini takomillashtirish” mavzusida 13.00.02 — Pedagogika fanlari bo‘yicha falsafa doktori (PhD) dissertatsiya ishini 2024-yil 7-dekabrda muvaffaqiyatli himoya qildi. Diplom № 015733, 30.12.2024.
Ilmiy rahbar: Termiz davlat pedagogika instituti Boshlang‘ich ta’limda matematika va ona tili kafedrasi mudiri, dotsent Shabbazova Dilfuza Ruzikulovna.

Termiz davlat pedagogika instituti huzuridagi PhD.03/30.07.2024.Ped.180.01 raqamli Ilmiy kengashda “Boshlang‘ich sinf o‘quvchilarining og‘zaki nutqini shakllantirish metodikasini takomillashtirish (sinfdan tashqari mashg‘ulotlar misolida)” mavzusidagi 13.00.02 — Pedagogika fanlari bo‘yicha falsafa doktori (PhD) dissertatsiya ishini 2024-yil 17-dekabrda muvaffaqiyatli himoya qildi. Diplom № 016421, 12.02.2025.

Termiz davlat pedagogika instituti huzuridagi PhD.03/30.07.2024.Ped.180.01 raqamli Ilmiy kengashda “Konsentrizm asosida ona tili darslarida tadqiqotchilik elementlarini shakllantirish metodikasini takomillashtirish” mavzusidagi 13.00.02 — Pedagogika fanlari bo‘yicha falsafa doktori (PhD) dissertatsiya ishini 2025-yil 6-mayda muvaffaqiyatli himoya qildi. Diplom № 21139, 11.07.2025.

Termiz davlat pedagogika instituti huzuridagi PhD.03/30.07.2024.Ped.180.01 raqamli Ilmiy kengashda “Imitatsion modellar asosida ijtimoiy-kommunikativ kompetentlikni rivojlantirish metodikasini takomillashtirish (ona tili darslari misolida)” mavzusidagi 13.00.02 — Pedagogika fanlari bo‘yicha falsafa doktori (PhD) dissertatsiya ishini 2025-yil 29-mayda muvaffaqiyatli himoya qildi. Diplom № 21201, 11.07.2025.
O‘zbekiston Respublikasi Prezidentining “Ma’muriy islohotlar doirasida oliy ta’lim, fan va innovatsiyalar sohasida davlat boshqaruvini samarali tashkil qilish chora-tadbirlari to‘g‘risida”gi 2023-yil 4-iyuldagi PQ-200-son qarori 9-bandida belgilangan topshiriq ijrosini ta’minlash maqsadida Termiz davlat pedagogika institutida 2024-yil 17–18-may kunlari O‘zbekiston Respublikasi Prezidentining “2022–2026-yillarga mo‘ljallangan Yangi O‘zbekistonning taraqqiyot strategiyasi to‘g‘risida”gi PF-60-son Farmoni ijrosini ta’minlash hamda O‘zbekiston Respublikasi Oliy ta’lim, fan va innovatsiyalar vazirligining 2024-yil 18-yanvardagi 16-sonli buyrug‘iga muvofiq “Boshlang‘ich ta’lim: samarali ta’lim amaliyoti, muammolari, istiqbollari” mavzusida xalqaro ilmiy-amaliy konferensiya bo‘lib o‘tdi.
Anjumanni tashkiliy qo‘mita raisi o‘rinbosari, Termiz davlat pedagogika instituti o‘quv ishlari prorektori, texnika fanlari doktori, dotsent Tojiyev Panji Jovliyevich kirish va tabrik so‘zi bilan ochdi. Konferensiyaga 490 ta ilmiy maqola kelib tushgan bo‘lib, shundan 41 tasi xorijlik olimlar, tadqiqotchilar va soha mutaxassislari tomonidan yuborilgan.
Boshlang‘ich ta’limda matematika va ona tili kafedrasi professor-o‘qituvchilari 2023-yil 19–20-may kunlari Termiz davlat pedagogika instituti Boshlang‘ich ta’lim fakultetida “Zamonaviy boshlang‘ich ta’lim: innovatsiyalar, muammolar va rivojlanish istiqbollari” mavzusidagi hamda 2024-yil 17–18-may kunlari “Boshlang‘ich ta’lim: samarali ta’lim amaliyoti, muammolari, istiqbollari” mavzusidagi xalqaro ilmiy-amaliy konferensiyalarni tashkil etishdi va o‘tkazishdi.
Konferensiyalarning ilmiy yo‘nalishi boshlang‘ich ta’limda innovatsion texnologiyalarni tatbiq etish hamda ulardan fan va ta’lim sohasida samarali foydalanishga qaratildi. Respublikamiz va xorijiy mamlakatlarda amalga oshirilayotgan ta’lim va tarbiya jarayonlarining bugungi yutuqlari, rivojlanishining asosiy yo‘nalish va xususiyatlarini ilmiy va innovatsion tahlil qilish, mutaxassislar tayyorlash sohasidagi islohotlarning mazmun-mohiyatini yoritish, shuningdek, yuksak ma’naviy va axloqiy talablarga javob beruvchi, yangicha fikrlaydigan, kreativ yondashuvga ega, ma’nan yetuk va sog‘lom barkamol avlodga ta’lim-tarbiya berishning ustuvor yo‘nalishlarini belgilash konferensiyalarning asosiy maqsadi hisoblanadi.





2024–2026-yillar mobaynida kafedra professor-o‘qituvchilari tomonidan darslik, o‘quv qo‘llanma, monografiya, maqola va tezislar chop ettirilgan. Ular orasida dunyoning nufuzli mamlakatlaridagi yuqori impakt-faktorli hamda Scopus va Web of Science kabi nufuzli bazalarda indekslanuvchi jurnallarda nashr etilgan ilmiy ishlar ham mavjud.

















Boshlang‘ich ta’limda matematika va ona tili kafedrasida pedagogika sohasida kadrlar tayyorlash hamda ta’lim sifatini oshirish borasida xalqaro darajadagi bir qancha samarali ishlar amalga oshirib kelinmoqda. Shadrinsk davlat pedagogika universiteti professori L. I. Ponomaryova va Abay nomidagi Qozog‘iston milliy pedagogika universiteti dotsenti A. Kariev 60110500 — Boshlang‘ich ta’lim yo‘nalishi talabalariga, Tojikiston baynalmilal chet tillar universiteti Tabiiy fanlar kafedrasi dotsenti I. D. Sayodov esa 70110500 — Ta’lim va tarbiya nazariyasi va metodikasi (boshlang‘ich ta’lim) mutaxassisligi magistrlariga ma’ruza mashg‘ulotlarini olib bordi.

Termiz davlat pedagogika institutida O‘zbekiston Respublikasi Prezidenti Shavkat Mirziyoyevning 2022-yil 21-iyundagi “Pedagogika ta’lim sifatini oshirish va pedagog kadrlar tayyorlovchi oliy ta’lim muassasalari faoliyatini yanada rivojlantirish chora-tadbirlari” to‘g‘risidagi qaroriga asosan bir qancha samarali ishlar amalga oshirib kelinmoqda. Xususan, institut rektori A. B. Xasanov tashabbusi bilan “Talabalar almashinuvi” dasturi doirasida ilk bor 60110500 — Boshlang‘ich ta’lim yo‘nalishi kunduzgi ta’lim shaklida tahsil oluvchi 5 nafar talaba Shadrinsk davlat pedagogika universitetiga o‘qishga yuborildi.

Termiz davlat pedagogika instituti Boshlang‘ich ta’lim yo‘nalishi 3-kursiga “Talabalar almashinuvi” dasturi doirasida Shadrinsk davlat pedagogika universitetining 3 nafar talabasi tashrif buyurdi. Talabalar ikki oy davomida o‘qituvchilardan olgan bilimlari, ta’lim jarayonlarining farqli jihatlari va institutda olgan taassurotlari haqida so‘zlab, “4+2” dasturi katta qiziqish uyg‘otganini ta’kidlashdi.

Termiz davlat pedagogika instituti bilan Rossiya-Tojikiston (Slavyan) universiteti o‘rtasida imzolangan xalqaro ilmiy va ta’lim hamkorligi to‘g‘risidagi memorandumga muvofiq Maktabgacha va boshlang‘ich ta’lim fakulteti Boshlang‘ich ta’lim yo‘nalishi 3-kurs talabalari 2024/2025-o‘quv yilining 6-semestrida, ya’ni 10-martdan 21-martga qadar Rossiya-Tojikiston (Slavyan) universitetiga talaba almashinuvi dasturi asosida o‘qishga yuborildi.

Ta’lim sifatini oshirish, xorijiy tajribani o‘rganish va ilmiy-metodik salohiyatni yanada mustahkamlash maqsadida Termiz davlat pedagogika instituti professor-o‘qituvchilari 12–23-dekabr kunlari Rossiya Federatsiyasining Qozon shahrida xizmat safarida bo‘lishdi. Jumladan, kafedra o‘qituvchilari D. Shabbazova va U. Muminova Qozon federal universitetida malaka oshirish kurslarida ishtirok etib, zamonaviy pedagogik yondashuvlar, innovatsion texnologiyalar, fanlararo integratsiya hamda xalqaro baholash tizimlari bo‘yicha chuqur bilim va amaliy ko‘nikmalarni egalladilar.
O‘zbekiston Respublikasi Vazirlar Mahkamasining “O‘zbekiston iqtidorli yoshlarini taqdirlash va moddiy rag‘batlantirish to‘g‘risida”gi qaroriga ko‘ra, har yili mamlakatimizda qobiliyatli yoshlarni rag‘batlantirish, ularni faol yaratuvchilik faoliyatiga keng jalb etish, iqtidorli o‘quvchilar, talabalar va magistrantlarni qo‘llab-quvvatlash hamda munosib taqdirlashga alohida e’tibor berib kelinmoqda. O‘zbekiston Respublikasi davlat oliy ta’lim muassasalarining bakalavriat bosqichida tahsil olayotgan talabalariga davlat stipendiyalari joriy etilgan. Shu munosabat bilan Termiz davlat pedagogika instituti Maktabgacha va boshlang‘ich ta’lim fakulteti Boshlang‘ich ta’limda matematika va ona tili kafedrasi ustozlari o‘z shogirdlariga maslahat berish va ularni qo‘llab-quvvatlashga katta ahamiyat berib kelmoqda.
Ustozlar shogirdlari bilan muntazam muloqot qilib, ularning muammolarini yechishda yordam berib kelmoqda. Natijada 2023-yilda Boshlang‘ich ta’lim yo‘nalishi talabasi Petryaeva Olesya Konstantinovna (ilmiy rahbari — Shabbazova Dilfuza Ruzikulovna) Navoiy nomidagi davlat stipendiyasi sovrindori bo‘ldi. 2024-yilda esa 4 nafar talaba davlat stipendiyalarini qo‘lga kiritdi: institut tarixida ilk bor 1 nafar Prezident stipendiyasi, 1 nafar Islom Karimov nomidagi va 2 nafar Alisher Navoiy nomidagi davlat stipendiyasi sovrindori bo‘ldi.

Farxodova Durdona Mansur qizi — Maktabgacha va boshlang‘ich ta’lim fakulteti Boshlang‘ich ta’lim yo‘nalishi talabasi. Ilmiy rahbari: Norqobilova Rayxona Davlatovna.

Qobilova Madina Sobir qizi — Maktabgacha va boshlang‘ich ta’lim fakulteti Boshlang‘ich ta’lim yo‘nalishi talabasi. Ilmiy rahbari: Shabbazova Dilfuza Ruzikulovna.

Hasanova Saboxat Komil qizi — Maktabgacha va boshlang‘ich ta’lim fakulteti Boshlang‘ich ta’lim yo‘nalishi talabasi. Ilmiy rahbari: Haydarova Maxliyo Xabibullayevna.

Xurramova Madina Abdunazar qizi — Maktabgacha va boshlang‘ich ta’lim fakulteti Boshlang‘ich ta’lim yo‘nalishi talabasi. Ilmiy rahbari: Shabbazova Dilfuza Ruzikulovna.
Termiz davlat pedagogika instituti Boshlang‘ich ta’limda matematika va ona tili kafedrasi tomonidan 2024–2025-o‘quv yili davomida talabalar ishtirokida bir qator bayramlarga bag‘ishlangan ma’naviy-ma’rifiy tadbirlar tashkil etildi. Ushbu tadbirlar talabalarning vatanparvarlik tuyg‘ularini mustahkamlash, milliy qadriyatlarni anglash va ularni asrab-avaylashga xizmat qildi.
Barcha tadbirlar talabalar faolligi, ijodiy yondashuvi va vatanparvarlik ruhida o‘tishi bilan ajralib turdi. Shu bilan birga, har bir tadbirda kafedra professor-o‘qituvchilari faol ishtirok etib, yoshlar ongida milliy g‘urur, hurmat va e’tiqod tuyg‘ularini shakllantirishga alohida e’tibor qaratildi.




Boshlang‘ich ta’limda matematika va ona tili kafedrasi mudiri — D. Shabbazova