Termiz davlat pedagogika institutida Talabalar amaliyoti bo‘limi xodimlari va “Tadbirkorlik asoslari” fani o‘qituvchilari ishtirokida talabalarga “Kelajak tadbirkori” loyihalari bo‘yicha tushunchalar berilganligi haqida
2026-yil 22-oktabr kuni Talabalar amaliyoti bo‘limi hamda “Tadbirkorlik asoslari” fani o‘qituvchilari ishtirokida uchrashuv o‘tkazildi. Tadbirda yoshlarni qo‘llab-quvvatlash maqsadida yaratilayotgan moliyaviy imkoniyatlar, jumladan, 15 foiz stavkadagi kredit shartlari hamda O‘zbekiston Respublikasi Markaziy bankining ta’lim krediti dasturi haqida batafsil ma’lumot berildi.
Uchrashuv davomida ishtirokchilarga yoshlar uchun mavjud kredit mexanizmlari, ularni olish tartibi va talab etiladigan hujjatlar bo‘yicha tushuntirishlar berildi. Ta’kidlanishicha, bunday imkoniyatlar yoshlarning o‘z biznesini boshlashi, bilim va ko‘nikmalarini amaliyotda qo‘llashi hamda mustaqil daromad manbaiga ega bo‘lishi uchun muhim ahamiyat kasb etadi.
Ta’lim krediti dasturi haqida so‘z yuritilganda, uning talabalarning o‘qish xarajatlarini qoplashdagi o‘rni, dasturdan foydalanish shartlari va qaytarish tartibi yoritildi. Shuningdek, 15 foiz stavkadagi kredit tadbirkorlik faoliyatini yo‘lga qo‘ymoqchi bo‘lgan yoshlar uchun qulay moliyaviy yechim ekani qayd etildi.
“Tadbirkorlik asoslari” fani o‘qituvchilari bu ma’lumotlarni talabalarga darslar jarayonida yetkazish, ularni amaliy misollar bilan boyitish va yoshlarda tadbirkorlik madaniyatini shakllantirish lozimligini bildirdi. Talabalar amaliyoti bo‘limi vakillari esa o‘z navbatida talabalarni amaliyot va ish bilan ta’minlash, ularni real iqtisodiy faoliyatga jalb etish yo‘nalishidagi ishlar davom ettirilishini aytdi. Uchrashuv yakunida ishtirokchilar yoshlarning moliyaviy savodxonligini oshirish, ularni mavjud imkoniyatlardan xabardor qilish va tadbirkorlik tashabbuslarini rag‘batlantirish bo‘yicha hamkorlikni kuchaytirishga kelishib oldi.