Hamkorlik

Termiz davlat pedagogika instituti hamda Qozog‘iston Respublikasining Shymkent shahridagi Mintaqaviy innovatsion universiteti o‘rtasida o‘zaro hamkorlikni rivojlantirishga qaratilgan Hamkorlik Memorandumi imzolandi.

Mazkur memorandum ta’lim, metodik va ilmiy-tadqiqot yo‘nalishlarida tajriba almashish, ilmiy aloqalarni mustahkamlash hamda oliy ta’lim sohasidagi hamkorlikni kengaytirishni nazarda tutadi.

Uchrashuv davomida professor-o‘qituvchilar, ilmiy xodimlar va talabalar almashinuvini yo‘lga qo‘yish, qo‘shma ilmiy tadqiqotlar olib borish, ilmiy maqola, metodik qo‘llanma va monografiyalar tayyorlash, shuningdek, malaka oshirish va amaliyotlarni tashkil etish masalalari muhokama qilindi.

Shuningdek, bakalavriat, magistratura va doktorantura bosqichlarida akademik va ilmiy almashinuvni rivojlantirish, qo‘shma ta’lim dasturlari va loyihalarni amalga oshirish, ilmiy-amaliy konferensiya va seminarlarni birgalikda tashkil etish bo‘yicha kelishuvlarga erishildi.

Uchrashuvda Qozog‘iston Respublikasining Shymkent shahridagi Mintaqaviy innovatsion universiteti tarix fanlari doktori N. Abdurahmonov, Termiz davlat pedagogika institutining Ilmiy va innovatsion ishlar bo‘yicha prorektori Sh. Kuldasheva, Xalqaro hamkorlik bo‘limi boshlig‘i U. Eshmuratov hamda Ta’lim sifatini ta’minlash bo‘limi boshlig‘i O. Isayev ishtirok etdi.

Tomonlar kelgusida ta’lim va ilm-fan sohasidagi aloqalarni izchil rivojlantirish hamda qo‘shma loyihalarni samarali amalga oshirishga kelishib oldilar.