“TINCHLIK — ENG OLIY NE’MAT, JAHOLATGA QARSHI — MA’RIFAT BILAN KURASH!”
Termiz davlat pedagogika institutida joriy yilning sentabr oyida talaba-yoshlarning diniy-ma’rifiy bilimlarini oshirish, ularning ma’naviy dunyoqarashini kengaytirish, turli yot va buzg‘unchi g‘oyalarga qarshi mafkuraviy immunitetini mustahkamlash, tinchlik va osoyishtalikning qadriga yetish hamda yoshlar orasida sog‘lom ma’naviy muhitni shakllantirish maqsadida bir qator ma’naviy-ma’rifiy tadbirlar tashkil etildi.
Tadbirlar “Jaholatga qarshi ma’rifat”, “Tinchlik — eng oliy ne’mat” hamda “Jaholatga qarshi — ma’rifat bilan kurash!” mavzulari asosida o‘tkazilib, unda yoshlarni turli zararli g‘oyalar, diniy mutaassiblik, jaholat va buzg‘unchi qarashlardan asrash, ularda mustahkam hayotiy pozitsiya va sog‘lom dunyoqarashni shakllantirish masalalariga alohida e’tibor qaratildi.
Tadbirlarda Imom Termiziy xalqaro ilmiy-tadqiqot markazi rektori K.Ismoilov va mas’ul xodim S.Saidov, Surxondaryo viloyati IIB Terrorizmga qarshi kurashish boshqarmasi Mafkuraviy targ‘ibot bo‘limi boshlig‘i I.Suyunov, institutning Yoshlar masalalari va ma’naviy-ma’rifiy ishlar bo‘yicha birinchi prorektori U.Turamuratov, professor-o‘qituvchilar, institut xodimlari hamda talaba-yoshlar ishtirok etdi.
Tadbir davomida so‘zga chiqqan mutaxassislar tomonidan tinchlik va osoyishtalik inson hayoti va jamiyat taraqqiyotining eng muhim omillaridan biri ekani, uni asrash har bir fuqaroning muhim vazifasi ekani haqida fikrlar bildirildi.
Shuningdek, jaholatning inson va jamiyat hayotiga salbiy ta’siri, diniy bilimlarning yetishmasligi natijasida yuzaga kelishi mumkin bo‘lgan turli noto‘g‘ri qarashlar, yot g‘oyalarning yoshlar ongiga ta’siri va ularga qarshi ma’rifat orqali kurashishning ahamiyati haqida atroflicha tushunchalar berildi.
Ayniqsa, bugungi axborot makonida yoshlarning turli manbalardan olinayotgan ma’lumotlarga tanqidiy va tahliliy yondashishi, har qanday axborotga ishonib ketmasligi, diniy va ma’rifiy masalalarda ishonchli manbalarga murojaat qilishi zarurligi ta’kidlandi.
Tadbir ishtirokchilariga yoshlarni milliy va umuminsoniy qadriyatlarga hurmat ruhida tarbiyalash, Vatanga sadoqat, insonparvarlik, bag‘rikenglik, o‘zaro hurmat va hamjihatlik kabi fazilatlarni shakllantirishning ahamiyati haqida ham ma’lumotlar berildi.
Shuningdek, talaba-yoshlar o‘rtasida turli zararli va buzg‘unchi g‘oyalarning oldini olishda ta’lim, tarbiya, kitobxonlik, ma’rifat va sog‘lom ma’naviy muhitning o‘rni muhim ekani qayd etildi.
Tadbir davomida talabalar o‘zlarini qiziqtirgan savollar bilan mutaxassislarga murojaat qilib, ular tomonidan berilgan savollarga batafsil va asoslantirilgan javoblar oldilar. Erkin muloqot shaklida o‘tgan suhbatlarda yoshlarning fikr va mulohazalari ham tinglandi.
Tadbir yakunida talaba-yoshlarga tinchlik va osoyishtalikni qadrlash, jaholatga qarshi ma’rifat bilan kurashish, bilim va tafakkur orqali turli yot g‘oyalarga qarshi immunitetni mustahkamlash, Vatan ravnaqi va jamiyat taraqqiyotiga munosib hissa qo‘shish yuzasidan tavsiyalar berildi.
Tinchlik — farovon hayotimizning eng muhim kafolati.
Ma’rifat — jaholatga qarshi eng samarali kuch.
Bilim va tafakkur — yoshlarni turli yot g‘oyalardan asraydigan mustahkam qalqondir.