Termiz davlat pedagogika instituti rektori ishtirokida sayyor qabul o'tkazildi

Termiz davlat pedagogika instituti rektori Xasanov Azizbek Baxtiyarovich hamda institut rahbariyati vakillari ishtirokida Termiz shahri va tumanlari, shuningdek, Angor tumanidagi maktabgacha ta’lim tashkilotlarida faoliyat yuritayotgan o‘rta maxsus ma’lumotli pedagog kadrlar bilan ochiq muloqot va sayyor qabul tashkil etildi.

Uchrashuv davomida pedagoglarning murojaatlari, taklif va muammolari tinglanib, ularni qiynayotgan masalalar hamda kasbiy rivojlanish imkoniyatlari muhokama qilindi.

Ochiq muloqotda, xususan, “1+5” dual ta’lim tizimi, oliy ta’lim olish imkoniyatlari, ta’lim jarayonini tashkil etish, pedagoglarning malakasini oshirish va boshqa dolzarb masalalarga alohida e’tibor qaratildi.

Sayyor qabul davomida ishtirokchilar o‘zlarini qiziqtirgan savollar bilan institut rektori va mas’ul rahbarlarga bevosita murojaat qilish imkoniga ega bo‘ldilar.

Bildirilgan taklif va murojaatlarni hal etish yuzasidan tegishli masʼullarga koʻrsatmalar berilib, nazoratga olindi.