“ENG YAXSHI TYUTOR” TANLOVIGA MARHAMAT!

Termiz davlat pedagogika institutida faoliyat yuritayotgan tyutorlar o‘rtasida “Eng yaxshi tyutor” tanlovi o‘tkaziladi.

Tanlovning asosiy maqsadi — kasbiy mahorati, ilg‘or tajribasi va ijodkorligi bilan ajralib turadigan, o‘z kasbiga sadoqatli, mas’uliyatli hamda tashabbuskor tyutorlarni aniqlash, ularning salohiyatini keng jamoatchilikka namoyish etish va ilg‘or tajribalarini ommalashtirishdan iborat.

Tanlov 3 ta nominatsiya bo‘yicha o‘tkaziladi:
— “Eng faol targ‘ibotchi tyutor” — talaba-yoshlar o‘rtasida ma’naviy-ma’rifiy va tarbiyaviy ishlarni samarali tashkil etish, targ‘ibotchilik faoliyati, tashabbuskorlik va tashkilotchilik qobiliyati baholanadi;
— “Eng faol kitobxon tyutor” — kitobxonlik madaniyati va savodxonligi, o‘zbek adabiyoti hamda jadidchilik harakati namoyandalari haqidagi bilimlari savol-javob va test orqali aniqlanadi;
— “Eng faol tashabbuskor tyutor” — tyutorlik faoliyati samaradorligini oshirishga qaratilgan tashabbuslar, amaliyotga tatbiq etilgan takliflar va o‘ziga xos faoliyat natijalari baholanadi.

Tanlov ikki bosqichda tashkil etiladi:

1-bosqich — fakultet bosqichi;
2-bosqich — institut bosqichi.

Fakultet bosqichida 1-, 2- va 3-o‘rinlarni egallagan tyutorlar institut bosqichida ishtirok etish huquqini qo‘lga kiritadi.

Ishtirokchilar quyidagi hujjatlarni taqdim etishlari lozim:

— to‘liq professional portfolio;
— tanlangan nominatsiya bo‘yicha tasdiqlovchi hujjatlar;
— faoliyat, tadbir, trening va loyihalarni aks ettiruvchi foto hamda videomateriallar.
Hujjatlar PDF yoki ZIP formatida elektron shaklda yoxud qog‘oz ko‘rinishida to‘liq va tartibli holda taqdim etiladi.

Yakuniy bosqichda har bir nominatsiya bo‘yicha 1-, 2- va 3-o‘rin sohiblari diplom va esdalik sovg‘alari, shuningdek, institutning ichki moliyaviy imkoniyatlaridan kelib chiqib pul mukofotlari bilan taqdirlanadi. Yakuniy bosqichning boshqa ishtirokchilariga sertifikatlar topshiriladi.

Hurmatli tyutorlar!

O‘z tajribangiz, bilimingiz, tashabbuslaringiz va kasbiy salohiyatingizni namoyon eting. “Eng yaxshi tyutor” tanlovida faol ishtirok eting!