Bugundan talabalar turar joyi uchun ariza yuborish jarayonlari boshlandi!
Talabalar turar joyiga ariza topshirish tartibi
O‘zbekiston Respublikasi Vazirlar Mahkamasining 2023-yil 14-avgustdagi 376-son qarori bilan tasdiqlangan reglamentga asosan, talabalar 1-avgustdan boshlab talabalar turar joyiga joylashish uchun arizalarini my.gov.uz portali orqali yuborishlari mumkin.
Reglamentga muvofiq, dastlab imtiyoz va ustuvorliklarga ega talabgorlar talabalar turar joylariga qabul qilinadi.
Shundan so‘ng, umumiy ro‘yxatdagi talabalar uchun yotoqxonada ortib qolgan o‘rinlar soniga nisbatan navbat asosida quyidagi tartibda joylar ajratiladi:
- 1-kurs talabalari uchun 55–65 foiz;
- 2-kurs talabalari uchun 15–20 foiz;
- 3-kurs va undan yuqori kurs talabalari uchun 20–25 foizgacha.
Arizalar qabuli 1-avgustdan boshlab o‘quv yili yakuniga qadar davom etadi.
Ma’lumot uchun: 2026/2027-o‘quv yilida oliy ta’lim tashkilotlarining 1-bosqichiga tavsiya etilgan abituriyentlar yakuniy natijalar e’lon qilingandan so‘ng ariza yuborishlari mumkin. Ular uchun ham joylar yuqoridagi tartib asosida ajratiladi.
Talabalar uchun yangi qulaylik
Endilikda talabalar turar joyiga joylashish va turgan joyi bo‘yicha vaqtincha ro‘yxatdan o‘tish kompozit, ya’ni birlashtirilgan xizmat orqali avtomatik tarzda amalga oshiriladi.
Nima o‘zgardi?
Ilgari talabalar turar joyiga joylashgandan so‘ng vaqtincha ro‘yxatdan o‘tish uchun alohida hujjatlar yig‘ish va boshqa idoralarga murojaat qilish talab etilardi. Endilikda ushbu xizmatlar birlashtirildi. Natijada ortiqcha vaqt sarfi va ovoragarchiliklarning oldi olinadi.
Kompozit xizmat qanday ishlaydi?
- Talabalar turar joyiga yuborilgan ariza ko‘rib chiqiladi hamda talabaga elektron shartnoma va yo‘llanma taqdim etiladi.
- Shartnomada ko‘rsatilgan to‘lov amalga oshirilgach, kompozit xizmat avtomatik ravishda ishga tushadi va vaqtincha ro‘yxatga olish uchun to‘lov shakllanadi.
- Vaqtincha ro‘yxatdan o‘tish to‘lovi amalga oshirilgandan so‘ng, talabaga turgan joyi bo‘yicha ro‘yxatga olinganligi haqidagi qayd varag‘i taqdim etiladi.
Muhim eslatma: turgan joyi bo‘yicha vaqtincha ro‘yxatga qo‘yish muddati to‘lov amalga oshirilgan kundan boshlab shartnomada ko‘rsatilgan muddat yakuniga qadar amal qiladi.