Termiz davlat pedagogika instituti rektori Namangan davlat texnika universitetning innovatsion infratuzilmasi bilan tanishdi
Termiz davlat pedagogika instituti rektori Azizbek Xasanov hamrohligidagi vakillar Namangan davlat texnika universitetida bo‘ldi. Mehmonlarni universitet rektori, professor Oybek Ergashev kutib olib, oliygohda amalga oshirilayotgan ilmiy-innovatsion faoliyat hamda zamonaviy infratuzilma bilan tanishtirdi.
Mehmonlar Sun’iy intellekt laboratoriyasida yaratilgan zamonaviy infratuzilma va ilmiy-amaliy imkoniyatlar bilan tanishdi. Shuningdek, laboratoriyada talabalarning nazariy bilimlarini amaliyot bilan uyg‘unlashtirish, sun’iy intellekt texnologiyalarini real loyihalarda qo‘llash hamda professor-o‘qituvchilarning ilmiy salohiyatini oshirishga qaratilgan ishlar haqida batafsil ma’lumot berildi.
Laboratoriya tarkibidagi tahlil markazi, robototexnika va bionika markazlari, startap-akselerator, 9 ta “aqlli” auditoriya hamda sun’iy intellekt yo‘nalishida ta’lim berishga mo‘ljallangan 2 ta maxsus tayyorgarlik xonasi faoliyati namoyish etildi.
Shuningdek, sun’iy intellekt, robototexnika, “aqlli” transport tizimlari, ekologiya va agrotexnologiyalar yo‘nalishlarida amalga oshirilayotgan innovatsion ilmiy-amaliy loyihalar haqida ma’lumot berildi hamda istiqboldagi hamkorlik masalalari yuzasidan fikr almashildi.