Termiz davlat pedagogika institutida “Bitiruv oqshomi – 2026” tantanali tadbiri bo‘lib o‘tdi
Termiz davlat pedagogika institutida bitiruvchilariga bag‘ishlangan “Bitiruv oqshomi – 2026” tantanali tadbiri ko‘tarinki ruhda tashkil etildi.
Tadbirda institut rektori A.Xasanov, Surxondaryo viloyati hokimining Yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari O.Ashurov, Termiz tumani hokimi Sh.Qalandarov hamda Termiz davlat muhandislik va agrotexnologiyalar universiteti rektori R.To‘rayev ishtirok etib, bitiruvchilarni samimiy muborakbod etdilar.
So‘zga chiqqanlar bitiruvchilarga kelgusi faoliyatlarida ulkan muvaffaqiyatlar, yuksak marralar va Vatan ravnaqi yo‘lidagi ezgu ishlarida zafarlar tilab, ularning mamlakat taraqqiyotiga munosib hissa qo‘shishlariga ishonch bildirdilar.
Shuningdek, tadbir davomida o‘qish va jamoat ishlarida yuqori natijalarga erishgan iqtidorli bitiruvchilar munosib taqdirlanib, bitiruvchilarga oliy ma’lumot to‘g‘risidagi diplomlar tantanali ravishda topshirildi.
Bayram oqshomi san’atkorlar hamda institutning iqtidorli talabalari ishtirokidagi musiqiy-badiiy konsert dasturi bilan yanada fayzli va ko‘tarinki ruhda davom etdi.