Termiz davlat pedagogika institutida “Karyera kuni” mehnat yarmarkasi o‘tkazildi
2026-yil 14-may kuni institut hamda kafedralar kesimida bitiruvchi talabalarni ish bilan ta’minlash, ularning kasbiy faoliyatga tezkor integratsiyasini qo‘llab-quvvatlash hamda ish beruvchi tashkilotlar bilan samarali hamkorlikni yo‘lga qo‘yish maqsadida mehnat yarmarkasi tashkil etildi. Mazkur tadbirda viloyatdagi davlat va nodavlat tashkilotlari, korxona va muassasalar, ta’lim tashkilotlari, bankmoliya sektori vakillari hamda xususiy tadbirkorlik subyektlari faol ishtirok etdilar. Jumladan, 50 dan ortiq tashkilot vakillari tomonidan 618 dan ortiq bo‘sh ish o‘rinlari taqdim etildi. Mehnat yarmarkasi davomida bitiruvchi talabalar o‘z mutaxassisliklari bo‘yicha mavjud ish o‘rinlari bilan tanishib, ish beruvchilar bilan bevosita muloqot o‘rnatish imkoniyatiga ega bo‘ldilar. Shuningdek, Surxondaryo viloyati bandlik boshqarmasi mutaxassislari tomonidan rezyume tuzish, ishga joylashish jarayonlari va mehnat qonunchiligi bo‘yicha tushuntirishlar berildi. Mehnat yarmarkasida 145 nafardan ortiq talaba dastlabki kelishuvga erishdi. Bundan tashqari 65 nafar ishsizlarga huquqiy maslahatlar berildi. Mazkur mehnat yarmarkasi bitiruvchilarning bandligini ta’minlash, ularning kasbiy ko‘nikmalarini amaliyot bilan mustahkamlash hamda institut va ish beruvchi tashkilotlar o‘rtasidagi hamkorlikni yanada rivojlantirishda muhim ahamiyat kasb etdi. Kelgusida ham bitiruvchilarni ish bilan ta’minlashga qaratilgan shu kabi tadbirlarni muntazam tashkil etish rejalashtirilgan.