Termiz davlat pedagogika instituti xalqaro hamkorlik aloqalarini kengaytirmoqda
Termiz davlat pedagogika institutida Amerika Qo‘shma Shtatlarining “PINACLE TEACHING SOLUTION” ta’lim tashkiloti bilan hamkorlikni rivojlantirish masalalariga bag‘ishlangan uchrashuv bo‘lib o‘tdi. Uchrashuvda institut rektori A.Xasanov, Xalqaro hamkorlik bo‘limi rahbari U.Eshmuratov, Amaliy ingliz tili kafedrasi mudiri S.Kabilova hamda tashkilotning O‘zbekistondagi direktori Don Vestal ishtirok etdi.
Uchrashuv yakunida tomonlar o‘rtasida hamkorlik memorandumi imzolandi. Institutning yangi foydalanishga topshirilayotgan binosidan bir qismi xalqaro til markazi sifatida tashkil etilishi rejalashtirilgani ta'kidlab o'tildi. Mazkur markazda xorijdan jalb etiladigan mutaxassislar faoliyat yuritishi, talabalar, professor-o‘qituvchilar hamda umumta’lim maktablari o‘qituvchi va o‘quvchilari uchun zamonaviy ta’lim dasturlari yo‘lga qo‘yilishi ko‘zda tutilgani aytildi.
Institut rektori A.Xasanov o‘z nutqida bugungi kunda nafaqat chet tillarini, balki matematika, fizika, sun’iy intellekt va axborot texnologiyalari kabi yo‘nalishlarni ham ingliz tilida o‘qitish davr talabi ekanligini ta'kidladi.
Don Vestal o‘z navbatida Termiz davlat pedagogika institutida amalga oshirilayotgan yangilanishlar, innovatsion yondashuvlar va rektorning ilg‘or tashabbuslari hamkorlikni yanada mustahkamlashga turtki berayotganini ta’kidladi hamda kelgusida birgalikda yirik loyihalarni amalga oshirishga tayyor ekanligini bildirdi.