“Yashil makon” umummilliy loyihasi doirasida keng ko‘lamli ko‘chat ekish tadbiri o‘tkazildi

O‘zbekiston Respublikasi Prezidenti Shavkat Mirziyoyev tashabbusi bilan amalga oshirilayotgan “Yashil makon” umummilliy loyihasi doirasida navbatdagi keng ko‘lamli ko‘chat ekish tadbiri bo‘lib o‘tdi. Mazkur tadbir doirasida Prezidentimiz tomonidan Milliy dendrologiya bog‘ini barpo etishga rasman start berildi.

Joriy yilda “Men ham ko‘chat ekaman” tashabbusi doirasida respublika bo‘ylab 75 million tupdan ziyod daraxt va buta ko‘chatlari ekilib, atrof-muhitni muhofaza qilish hamda ekologik barqarorlikni ta’minlash yo‘lida muhim qadam tashlandi.

Shuningdek, yaqinda imzolangan farmonga muvofiq, 2030-yilga qadar mamlakatimizda yashillik darajasini 30 foizga yetkazish, aholi jon boshiga to‘g‘ri keladigan yashil hududlarni 10 kvadrat metrga oshirish kabi ulkan maqsadlar belgilandi. Ushbu vazifalar doirasida hududlarda yirik ekologik loyihalar amalga oshiriladi.

Jumladan:
Surxondaryo viloyatida 10 ming gektar maydonda “yashil makon” barpo etiladi;
Sirdaryo viloyatida 84 kilometrli “yashil devor” tashkil qilinadi;
Qoraqalpog‘istonda 1 million gektar, Navoiy va Buxoroda 300 ming gektardan, Xorazmda 85 ming gektar cho‘l hududlarida yangi o‘rmonzorlar yaratiladi.

Bundan tashqari, viloyat hokimlariga har biri kamida 100 gektar maydonda botanika va dendrologiya bog‘lari hamda 20 tadan soya-salqin sayr ko‘chalari tashkil etish vazifasi yuklatildi. Ekologiya va aholi salomatligi masalalari dolzarb ahamiyat kasb etayotgan bugungi kunda hududga mos daraxt turlarini tanlash va ekishda ilmiy yondashuv, xususan, Xalqaro molekulyar allergologiya markazining tavsiyalari muhimligi alohida ta’kidlandi.

Mazkur ekologik tashabbus doirasida Termiz davlat pedagogika instituti rektori boshchiligida institut rahbariyati hamda talaba-yoshlari faol ishtirok etib, hududda ko‘chat ekish ishlariga munosib hissa qo‘shdilar. Ularning ushbu tashabbusdagi ishtiroki yoshlar orasida ekologik madaniyatni oshirish, tabiatga mehr va mas’uliyat hissini kuchaytirishda muhim omil bo‘ldi.

Ta’kidlash joizki, “Yashil makon” loyihasi kelajak avlod uchun sog‘lom va barqaror ekologik muhit yaratishga xizmat qiluvchi muhim umummilliy harakat hisoblanadi.