Kiberjinoyatchilikka qarshi targ‘ibot tadbiri o‘tkazildi
Termiz davlat pedagogika institutida talaba-yoshlar o‘rtasida jinoyatchilik va huquqbuzarliklar profilaktikasi hamda kiberjinoyatchilikning oldini olishga qaratilgan targ‘ibot tadbiri tashkil etildi.
Tadbir davomida ijtimoiy tarmoqlar orqali sodir etilayotgan firibgarlik, onlayn o‘g‘rilik va boshqa turdagi kiberjinoyatlar, ularning oldini olish choralari haqida batafsil tushuntirishlar berildi. Shuningdek, talabalarga internetdan xavfsiz foydalanish, shaxsiy ma’lumotlarni himoya qilish va turli tahdidlardan ogoh bo‘lish bo‘yicha amaliy tavsiyalar taqdim etildi.
Surxondaryo viloyati ichki ishlar boshqarmasi Axborot texnologiyalari sohasidagi jinoyatlarga qarshi kurashish bo‘linmasi tomonidan ishlab chiqilgan “APK-qo‘riqchi” dasturi talabalarning mobil qurilmalariga o‘rnatib berildi. Mazkur dastur orqali telefonlardagi zararli ilovalarni aniqlash va ulardan himoyalanish imkoniyatlari haqida tushuntirishlar berildi.
Tadbirda institut profilaktika inspektori B. Allaberdiyev, Yoshlar masalalari va ma’naviy-ma’rifiy ishlar bo‘yicha birinchi prorektori U. Turamuratov, O‘zbekiston Respublikasi Markaziy banki mutaxassislari — Ibragimova Mohinur San’at qizi hamda B. Farmonov, shuningdek tyutorlar va talaba-yoshlar faol ishtirok etdilar.
Mazkur targ‘ibot tadbiri yoshlarning kiberxavfsizlik bo‘yicha bilim va ko‘nikmalarini mustahkamlash, axborot madaniyatini yuksaltirish hamda turli jinoyatlarga nisbatan huquqiy ongini oshirishda muhim ahamiyat kasb etdi.