YOSHLAR QALBIDA VATANPARVARLIK TUYG‘ULARI MUSTAHKAMLANMOQDA

Surxondaryo viloyatida mamlakatimiz xavfsizligi va mudofaa salohiyatini yanada mustahkamlash, shuningdek, ochiq, pragmatik va faol tashqi siyosatni targ‘ib etish maqsadida muhim uchrashuv tashkil etildi.

Mazkur tadbir O‘zbekiston Respublikasi Veteran jangchi, faxriylar va nogironlar birlashmasi Surxondaryo viloyati bo‘limi kengashi a’zolari tomonidan Termiz davlat pedagogika institutida 1-bosqich magistr talabalari ishtirokida o‘tkazildi.

Uchrashuv davomida soha mutaxassislari va faxriylar tomonidan mamlakatimiz mudofaa siyosatining ustuvor yo‘nalishlari, milliy xavfsizlikni ta’minlash borasida amalga oshirilayotgan islohotlar hamda yoshlarning ushbu jarayondagi o‘rni haqida batafsil ma’lumotlar berildi. Shuningdek, ochiq va pragmatik tashqi siyosatning mazmun-mohiyati, uning xalqaro maydondagi ahamiyati hamda O‘zbekiston nufuzini oshirishdagi o‘rni keng yoritildi.

Tadbir davomida faxriylar o‘zlarining hayotiy tajribalari, xizmat faoliyatlari hamda yurt tinchligi yo‘lida amalga oshirgan fidokorona xizmatlari haqida so‘zlab berdilar. Bu esa talaba-yoshlar qalbida Vatanga sadoqat, yurt himoyasiga tayyorlik va yuksak mas’uliyat tuyg‘ularini yanada mustahkamladi.

Uchrashuv yakunida talabalar o‘zlarini qiziqtirgan savollarga javob oldilar hamda bunday uchrashuvlarning ahamiyati yuqori ekanligini alohida ta’kidladilar.

Mazkur tadbir yosh avlodni vatanparvarlik ruhida tarbiyalash, ularda yurt taqdiri va taraqqiyotiga daxldorlik hissini shakllantirishda muhim ahamiyat kasb etdi.