Termiz davlat pedagogika institutida “Yoshlar kuni” doirasida qator tadbirlar o‘tkazildi

Prezidentimiz tashabbusi bilan mamlakatimizda haftaning har payshanba kuni vazirlik, idora va hokimliklarda “Yoshlar kuni” sifatida belgilangan. Davlatimiz rahbari qarorlari ijrosini ta’minlash maqsadida bugun Termiz davlat pedagogika institutida “Yangi O‘zbekiston yoshlari, birlashaylik!” shiori ostida yoshlar festivali o‘tkazildi.

Tadbirni Surxondaryo viloyati hokimi Ulug‘bek Qosimov ochib, talabalarga o‘zining tilak va tavsiyalarini takidladi. Festival doirasida turli ko‘rgazmali chiqishlar, badiiy sahnalar hamda ijodiy namoyishlar tashkil etilib, ishtirokchilarga ko‘tarinki kayfiyat ulashdi.

Jarayon davomida tadqiqotchi talabalar o‘zlarining ilmiy ishlari bilan qatnashib, innovatsion g‘oya va loyihalarini taqdim etdilar. Shuningdek, tadbir doirasida “Kariyera kuni” mehnat yarmarkasi ham tashkil etilib, unda shahar va tumanlarda mavjud bo‘sh ish o‘rinlari haqida talabalarga batafsil ma’lumotlar berildi.

Jarayonlar “Hokim va yoshlar uchrashuvi” ga ulanib ketdi. Unda oliygoh talabalari viloyat rahbariga o‘z taklif va murojaatlarini bildirdilar. Viloyat hokimi yoshlar bilan samimiy muloqot olib borib, ularning sport, fan, ta’lim, adabiyot va boshqa yo‘nalishlardagi tashabbus va loyihalarini qo‘llab-quvvatlashini ta’kidladi hamda mas’ullarga tegishli topshiriqlar berdi. Uchrashuv yakunida bir guruh iqtidorli talabalar zamonaviy kompyuter jamlanmalari bilan taqdirlandilar.

Shu bilan birgalikda buyuk davlat arbobi va sarkarda, ilm-fan, madaniyat va san’at homiysi Sohibqiron Amir Temur tavalludining 690 yilligi munosabati bilan kitoblar ko‘rgazmasi tashkil etildi. Qolaversa iqtidorli talabalar tomonidan Amir Temur hayoti va faoliyatiga bag‘ishlangan ijodiy chiqishlar sahna ko‘rinishlari namoyish etilib, yig‘ilganlarda katta taassurot qoldirdi.