Tojikistondagi almashinuv
Termiz davlat pedagogika institutida xalqaro akademik hamkorlik doirasida talabalar almashinuvi dasturi amaliy bosqichda davom etmoqda. Dastur doirasida institutning kunduzgi ta’lim shaklida tahsil olayotgan 8 nafar talabasi Rus tili va adabiyoti kafedrasi mudiri Sh. Berdiyeva boshchiligida Tojikiston Respublikasiga ta’lim olish va akademik tajriba almashish maqsadida yuborildi.
Mazkur almashinuv talabalarning xalqaro ta’lim muhiti bilan tanishishi, mintaqaviy akademik aloqalarni mustahkamlashi, madaniy-ma’rifiy makon bilan yaqindan tanishishi hamda kasbiy va kommunikativ kompetensiyalarini rivojlantirishga xizmat qiladi. Dastur doirasida talabalar dastlabki kunning o‘zidayoq Tojikiston Respublikasida Somoniy davlati tashkil topganining 1100 yilligi munosabati bilan qad rostlagan Ismoil Somoniy haykali va Tojikiston Milliy kutubxonasiga tashrif buyurdilar.
Ushbu tashabbus Termiz davlat pedagogika institutida talabalar almashinuvi mexanizmlarining amalda ishlayotganini, xorijiy ta’lim muhiti bilan integratsiyani kuchaytirayotganini va hamkorlikni real akademik mobillik shaklida rivojlantirayotganini ko‘rsatadi. Ma’lumotga ko‘ra, dastur doirasidagi o‘qish jarayoni 21-oktabrga qadar davom etadi.