“Art day” doirasida talabalarning ijodiy faolligi va mazmunli bo‘sh vaqti qo‘llab-quvvatlandi
Termiz davlat pedagogika instituti Pedagogika va san’at fakultetida talabalarning bo‘sh vaqtini mazmunli tashkil etish, ularning san’atga bo‘lgan qiziqishini oshirish va ijodiy salohiyatini namoyon etish maqsadida “Art day” madaniy loyihasi doirasida ijodkor talaba-yoshlarning shaxsiy ijodiy ishlar ko‘rgazmasi tashkil etildi.
Ko‘rgazma davomida talabalar tomonidan yaratilgan tasviriy san’at namunalari mehmonlar va professor-o‘qituvchilarga taqdim etildi. Tadbir ijodiy fikrlash, estetik did, o‘zini erkin ifoda etish va talabalarning ijobiy ijtimoiy faolligini qo‘llab-quvvatlashga xizmat qildi. Bunday format talabalarning darsdan tashqari ishtirokini kuchaytirish, campus hayotida konstruktiv va mazmunli muhit yaratish hamda ijodkor yoshlarni rag‘batlantirish nuqtai nazaridan muhim ahamiyatga ega.
Tadbir doirasida institut psixologi N. Abdullayeva ko‘magida talabalar o‘zlari chizgan va rang bergan suratlar orqali emotsional holat, tasavvur va shaxsiy yondashuvlarini refleksiya qilish imkoniyatiga ega bo‘ldilar. Shu jihatdan, loyiha nafaqat ijodiy ko‘rgazma, balki talabalarning o‘zini anglash, ruhiy tetiklik va ijobiy talabalik muhitini qo‘llab-quvvatlashga xizmat qiluvchi amaliy tashabbus sifatida namoyon bo‘ldi.
Mazkur faoliyat institutning mazmunli bo‘sh vaqt, talaba farovonligi, ijodiy ishtirok va ijobiy kampus muhitini rivojlantirishga qaratilgan tizimli ishlarining muhim qismi hisoblanadi.