Alohida ta’lim ehtiyojlari bo‘lgan bolalarni qo‘llab-quvvatlash bo‘yicha inklyuziv tadbir tashkil etildi
Termiz davlat pedagogika instituti Pedagogika va inklyuziv ta’lim kafedrasi Maxsus pedagogika: defektologiya yo‘nalishining 1-bosqich talabalari hamda “Mehrli qo‘llar” volontyorlar guruhi tashabbusi bilan Sho‘rchi tumanidagi 68-sonli ixtisoslashtirilgan maktab-internatda alohida ta’lim ehtiyojlari bo‘lgan bolalar uchun “Biz birgamiz — bir safdamiz” shiori ostida “Beg‘uborsan bolajon” nomli tadbir tashkil etildi.
Tadbir davomida talabalar turli ertak qahramonlari obrazlarida ishtirok etib, bolalar bilan qiziqarli o‘yinlar o‘tkazdilar, jonli ijroda qo‘shiqlar kuyladilar va do‘stona, qo‘llab-quvvatlovchi muhit yaratishga hissa qo‘shdilar. Mazkur yondashuv bolalarning ijtimoiy faolligini rag‘batlantirish, ijobiy emotsional holatini qo‘llab-quvvatlash va ular uchun mehr-muruvvatga asoslangan inklyuziv muhitni kuchaytirishga xizmat qildi.
Alohida e’tiborga molik jihati shundaki, tadbirda institutning maxsus pedagogika yo‘nalishidagi talabalari amaliy ishtirok etib, alohida ta’lim ehtiyojlari bo‘lgan bolalar bilan ishlash, sezgir pedagogik yondashuvlarni kuzatish va qo‘llab-quvvatlovchi ta’lim muhitining ahamiyatini amaliy jihatdan anglash imkoniyatiga ega bo‘ldilar. Ma’lumot o‘rnida, mazkur maktab-internatda hozirda 386 nafar bola ta’lim-tarbiya oladi.
Shu jihatdan, ushbu faoliyat institutning inklyuziv qo‘llab-quvvatlash, teng ishtirok, amaliy pedagogik tayyorgarlik va ijtimoiy mas’uliyatni rivojlantirishga qaratilgan institutsional yondashuvining muhim qismi hisoblanadi.