Sog‘lom va xavfsiz ta’lim muhitini mustahkamlash bo‘yicha institutsional profilaktik yig‘ilish

Termiz davlat pedagogika institutida giyohvandlik va narkojinoyatlarga qarshi kurashish, talaba-yoshlarni zararli odatlardan himoya qilish hamda sog‘lom va xavfsiz ta’lim muhitini mustahkamlashga qaratilgan institutsional profilaktik yig‘ilish tashkil etildi. Yig‘ilish O‘zbekiston Respublikasi Prezidentining PF-207-son Farmonida belgilangan vazifalarni ta’lim muassasasi darajasida samarali amalga oshirish masalalariga bag‘ishlandi.

Yig‘ilishda Yoshlar masalalari va ma’naviy-ma’rifiy ishlar bo‘yicha birinchi prorektor, Yoshlar bilan ishlash, ma’naviyat va ma’rifat bo‘limi xodimlari, Xotin-qizlar maslahat kengashi a’zolari, profilaktika inspektorlari, tyutorlar, Yoshlar ittifoqi boshlang‘ich tashkiloti yetakchilari va koordinatorlari hamda jamoatchilik guruhlari vakillari ishtirok etdilar. Muhokamalar davomida giyohvandlikning oldini olish bo‘yicha ma’rifiy va profilaktik ishlarni kuchaytirish, ota-onalar va pedagoglar mas’uliyatini oshirish, ta’lim muassasasida sog‘lom va xavfsiz muhit yaratish, shuningdek talabalarning bo‘sh vaqtini mazmunli tashkil etish masalalari ko‘rib chiqildi.

Shuningdek, yig‘ilish jarayonida profilaktik tadbirlarni tizimlashtirish, psixologik xizmat faoliyatini kuchaytirish va talabalar bilan manzilli ishlash mexanizmlarini takomillashtirish bo‘yicha qo‘shimcha takliflar muhokama qilindi. Yakunda tegishli bo‘lim va mas’ullar zimmasiga farmon ijrosini to‘liq va samarali ta’minlashga qaratilgan aniq vazifalar belgilab berildi.

Mazkur yig‘ilish institutda xavfsiz ta’lim muhiti, psixologik farovonlik, profilaktik boshqaruv va talabalarni kompleks himoya qilishga qaratilgan tizimli institutsional yondashuvning muhim ko‘rinishi hisoblanadi