Vazir va qizlar uchrashuvi

Maktabgacha va maktab ta’limi vaziri E’zoza Karimova o‘quvchi qizlar o‘rtasida futbol bo‘yicha o‘tkazilayotgan “Maktabgacha va maktab ta’limi vaziri kubogi” musobaqasi ishtirokchilari bilan uchrashdi.

Samimiy va o‘zaro muloqot ruhida tashkil etilgan tadbirda qizlar o‘rtasida sportning, xususan futbol o‘yinlarining o‘rni va ahamiyati, yurtimiz dovrug‘ini dunyoga taratishda uning qanchalik muhim ekanligi xususida fikr yuritildi.

Vazir uchrashuv davomida o‘quvchi qizlar va ularning murabbiylari bilan shaxsan suhbat olib bordi hamda musobaqaning final bahsi ishtirokchi jamoalariga omad tiladi.

Shu o‘rinda o‘quvchilar ham “Maktabgacha va maktab ta’limi vaziri kubogi” musobaqasining yuqori saviyada tashkil etilayotganligi hamda yaratilgan barcha imkoniyat va sharoitlar uchun minnatdorlik bildirdi.

Uchrashuv so‘nggida faol o‘quvchi qizlarga turli esdalik sovg‘alari topshirildi.