Navro‘z umumxalq bayramiga tayyorgarlik ishlari muhokama qilindi

Surxondaryo viloyatida sharqona yangi yil va xalqimizning umummilliy bayrami — Navro‘z ayyomiga tayyorgarlik ishlari qizg‘in davom etmoqda.

Bugun viloyat hokimi Ulug‘bek Qosimov Termiz davlat pedagogika institutida bayram tadbirlariga tayyorgarlik ko‘rish bo‘yicha mas’ullarga yuklatilgan vazifalar ijrosini muhokama qildi. Yig‘ilishda mutasaddilar tomonidan ishlab chiqilgan madaniy dasturlar, sahna va hududni bezatishga oid dizayn takliflari, shuningdek sport musobaqalari va xalq o‘yinlari bo‘yicha ssenariylar taqdim etildi.

Viloyat rahbari bildirilgan takliflarni mazmunan boyitish, dekoratsiya va sahna yechimlarini yanada takomillashtirish zarurligini ta’kidlab, bayram tadbiri o‘tkaziladigan "Yangi O‘zbekiston" massivi amfiteatr maydonida amaliy ishlarga kirishish yuzasidan aniq vazifalar belgilab berdi.

Shuningdek, kelgusi hafta pavilonlarni o‘rnatish va ularni bayramona ruhda bezatish ishlarini joyiga chiqqan holda o‘rganish va muvofiqlashtirish belgilandi.