Talabalar ogohligi – sog‘lom kelajak kafolati
Termiz davlat pedagogika institutida giyohvandlik va narkojinoyatlarga qarshi murosasiz kurash, sog‘lom hayot va xavfsiz kelajak g‘oyalarini targ‘ib etuvchi navbatdagi ma’naviy-ma’rifiy targ‘ibot tadbir bo‘lib o‘tdi.
Bugungi kunda giyohvandlik va narkojinoyatlarga qarshi kurash masalasi butun dunyoda bo‘lgani kabi mamlakatimizda ham dolzarb ahamiyat kasb etmoqda. Shu bois O‘zbekiston Respublikasi Prezidentining O'zbekiston Respublikasi Prezidentining 2025-yil 3-noyabrdagi PF-207-sonli Farmoni Farmon asosida institutda yoshlar o‘rtasida sog‘lom turmush tarzini targ‘ib etish giyohvandlik va psixotrop moddalar xavfi haqida tizimli tushuntirish ishlari olib borilmoqda.
Shu maqsadda Surxondaryo viloyati IIB mas’ul xodimlari bilan hamkorlikda, “Yoshlar markazi” binosida talabalar ishtirokida ma’naviy-ma’rifiy uchrashuv tashkil etildi.
Tadbirni institut birinchi prorektori Ulug‘bek Turamuratov ochib berdi. Uchrashuvda viloyat IIB TQX JQB giyohvandlik va psixotrop moddalarining noqonuniy muomalasiga qarshi kurashish boshqarmasi xodimi O.Jabborov va Sog‘liqni saqlash tizimi vakillari giyohvandlikning inson salomatligi, oila va jamiyat hayotiga yetkazadigan salbiy oqibatlari hamda uning huquqiy oqibatlari haqida atroflicha ma’lumot berdilar.
Shuningdek, tadbir davomida viloyat IIB Axborot texnologiyalari sohasidagi jinoyatlarga qarshi kurashish boshqarmasi xodimlari — mayor O.Umarov va katta leytenant B.Abdualimov tomonidan kiberjinoyatlarning eng ko‘p uchrayotgan turlari hamda ulardan himoyalanish yo‘llari tushuntirildi.
Bunday tadbirlar yoshlar orasida hushyorlik, mas’uliyat va kelajakka ongli munosabatni shakllantirishga xizmat qiladi.