Hamkorlik Memorandumi imzolandi

Bugun Surxondaryo viloyati Maktabgacha va maktab ta’limi boshqarmasi hamda Termiz davlat pedagogika instituti o‘rtasida o‘zaro hamkorlikni yanada mustahkamlashga qaratilgan Memorandum imzolandi.

Mazkur hamkorlik O‘zbekiston Respublikasi Prezidentining 2022-yil 21-iyundagi PQ–289-sonli “Pedagogik ta’lim sifatini oshirish va pedagog kadrlar tayyorlovchi oliy ta’lim muassasalari faoliyatini yanada rivojlantirish chora-tadbirlari to‘g‘risida”gi qarorida belgilangan vazifalar, shuningdek O‘zbekiston Respublikasi Maktabgacha va maktab ta’limi vazirining 2025-yil 19-dekabrdagi 38-sonli bayoni ijrosini ta’minlash maqsadida tashkil etildi.

Uchrashuv davomida umumta’lim va maktabgacha ta’lim tashkilotlarini yuqori malakali pedagog kadrlar bilan ta’minlash, nazariya va amaliyot uyg‘unligini kuchaytirish, talabalarni ta’lim jarayoniga faol jalb etish hamda ularda amaliy ko‘nikmalarni shakllantirish masalalari atroflicha muhokama qilindi.

Shuningdek, chekka hududlardagi xorijiy til o‘qituvchilariga ehtiyoj mavjud bo‘lgan maktablarda masofaviy darslarni tashkil etish, institutning 3–4-bosqich talabalari uchun haftalik o‘quv mashg‘ulotlarini “4+2” tartibida tashkil etish, ya’ni darslarning 4 kuni oliy ta’lim muassasasida, 2 kuni esa maktabgacha va umumiy o‘rta ta’lim muassasalarida amaliyot shaklida olib borilishi bo‘yicha kelishuvga erishildi.

Tomonlar kelgusida belgilangan vazifalarni samarali amalga oshirish, o‘zaro hamkorlikni izchil rivojlantirish va ta’lim sifatini oshirishga qaratilgan chora-tadbirlarni amalga oshirish maqsadida Hamkorlik Memorandumini imzoladilar.