Termiz davlat pedagogika institutida professor-o‘qituvchilar uchun TOP-300 ta talik oliy ta’lim muassasalarining o‘quv dasturlari asosida seminar bo‘lib o‘tdi
Bugungi kunda oliy ta’lim sifatini xalqaro standartlar asosida oshirish va raqobatbardosh kadrlar tayyorlash muhim hisoblanadi. Shu maqsadda institutda professor-o‘qituvchilar uchun dunyoning TOP-300 talik universitetlarining ta’lim dasturlari tajribasi asosida o‘quv dasturlarini maqbullashtirishga bag‘ishlangan o‘quv seminar tashkil etildi.
Seminar-trening professional mutaxassislar tomonidan olib borilib, unda xorijiy yetakchi universitetlarning o‘quv dasturlarining tuzilishi, fanlar mazmuni, kredit-modul tizimi, kompetensiyaga yo‘naltirilgan yondashuv hamda zamonaviy pedagogik texnologiyalar haqida batafsil tushuntirishlar berildi.
Shuningdek, ishtirokchilarga o‘quv dasturlarini xalqaro talablar asosida tahlil qilish, fan sillabuslarini yangilash hamda aniq ta’lim natijalarini belgilash bo‘yicha amaliy tavsiyalar taqdim etildi. Seminar doirasida fanlararo integratsiya, amaliy mashg‘ulotlar ulushini oshirish va mustaqil ta’limni samarali tashkil etish kabi dolzarb masalalarga alohida e’tibor qaratildi.
Seminar ishtirokchilari oʻz fikr-mulohazalarini bildirish bilan birga, yuzaga kelayotgan muammolar hamda ularning yechimlari bo‘yicha muhokamalar olib bordilar. Ta’kidlanganidek, bunday amaliyot o‘quv dasturlarini xalqaro reytinglardagi yetakchi universitetlar tajribasidan kelib chiqib yaxshilashga yordam beradi, natijada ta’lim sifati oshib, bitiruvchilarning mehnat bozoridagi raqobatbardoshligi taʼminlanadi.