“Energiya samaradorligini oshirish va energiya tejash” mavzusida seminar-trening tashkil etildi

Bugungi kunda energiya resurslaridan oqilona foydalanish, energiya tejamkor texnologiyalarni hayotga tatbiq etish va yoshlar ongida energiya samaradorligi madaniyatini shakllantirish dolzarb masalalardan biri hisoblanadi. Shu maqsadda Termiz davlat pedagogika institutida talabalarning nazariy bilimlarini mustahkamlash hamda amaliy ko‘nikmalarini oshirishga qaratilgan seminar-trening tashkil etildi.

Mazkur seminar-trening  institut Tabiiy va aniq fanlar fakulteti Fizika kafedrasi mudiri B.Ismailov tomonidan o‘tkazildi. Tadbir tasdiqlangan o‘quv dasturiga muvofiq hamda dars jadvali asosida olib borilib, unda energiya samaradorligini oshirish, energiya resurslaridan oqilona foydalanish, energiya tejashning zamonaviy usullari va ularning kundalik hayotdagi ahamiyati haqida batafsil ma’lumotlar berildi.

Seminar davomida talabalarga energiya tejamkor texnologiyalarning afzalliklari, energiya yo‘qotishlarini kamaytirish yo‘llari, qayta tiklanuvchi energiya manbalaridan foydalanish imkoniyatlari hamda ushbu yo‘nalishdagi dolzarb muammolar yuzasidan tushunchalar berildi. Shuningdek, energiyani tejash orqali nafaqat iqtisodiy samaradorlikka erishish, balki atrof-muhitni muhofaza qilish, ekologik barqarorlikni ta’minlash mumkinligi alohida ta’kidlandi.

“Energiya tejamkorligi – kelajak uchun mas’uliyat” degan g‘oya seminar-treningning bosh mavzusi bo‘lib, talabalar bu borada o‘z fikr-mulohazalarini bildirdilar hamda faol ishtirok etdilar. Tadbir yoshlarni energiya resurslariga mas’uliyat bilan yondashishga, ilmiy-texnik yangiliklardan samarali foydalanishga undashi bilan ahamiyatli bo‘ldi.