Bu bog‘lar bir bog‘lar bo‘ladiki hali…
Termiz davlat pedagogika institutida “Yashil makon” umummilliy tashabbusi doirasida keng ko‘lamli hashar o‘tkazilib, oliygoh hovlisida mevali va manzarali daraxt ko‘chatlari ekildi, mavjud yashil hududlar tartibga keltirildi hamda obodonlashtirish ishlari amalga oshirildi.
Hashar davomida institut xodimlari va talabalar faol ishtirok etib, daraxt ko‘chatlarini ekish, ularni parvarishlash, tuproq sifatini saqlash hamda suv resurslaridan tejamli foydalanishga alohida e’tibor qaratdilar. Shuningdek, hududni tozalash, mavjud daraxtlarni parvarish qilish va yangi ekilgan ko‘chatlarning o‘sib rivojlanishi uchun qulay sharoit yaratish bo‘yicha amaliy ishlar bajarildi.
Ushbu hashar nafaqat hududni ko‘kalamzorlashtirish va obodonlashtirish, balki talabalar, mahalliy fermerlar va bog‘dorchilik xo‘jaliklari o‘rtasida amaliy tajriba almashish maydoni sifatida ham xizmat qildi. Jarayon davomida ko‘chat ekish va parvarishlash texnologiyalari, tuproq unumdorligini saqlash, daraxtlarning o‘sishi uchun maqbul sharoit yaratish hamda sug‘orishda suvdan oqilona foydalanish bo‘yicha amaliy bilim va tajribalar mahalliy fermerlar va bog‘dorchilik xo‘jaliklari vakillari bilan o‘rtoqlashildi.
Mazkur tashabbus institut jamoasining ekologik madaniyatini yuksaltirish, yashil hududlarni kengaytirish, talabalar va mahalliy qishloq xo‘jaligi vakillari o‘rtasida amaliy hamkorlikni rivojlantirishga xizmat qildi.