“Xorijiy tillarni mutaxassislik fanlariga o‘qitishning yangi pedagogik yondashuvlari” mavzusida ilmiy-amaliy konferensiya bo‘lib o‘tdi.

Bugungi globallashuv davrida ilm-fan va texnologiyalar tez sur’atlar bilan rivojlanmoqda. Bu jarayon mutaxassislik bilimlarini chuqur o‘rganish bilan birga, ularni xalqaro miqyosda qo‘llash va hamkorlikni rivojlantirish zaruratini yuzaga keltirmoqda.

 Shu bois, xorijiy tillarni o‘rganish va mutaxassislik fanlarini uyg‘unlashtirish uchun yangi pedagogik metodlar ishlab chiqilishi dolzarb ahamiyatga ega.

 Yangi yondashuvlar talabalarga nafaqat xorijiy tilni, balki sohaviy terminologiya va kommunikativ ko‘nikmalarni samarali o‘zlashtirish imkonini beradi. Bu esa ta’lim jarayonini interfaol, amaliy va talaba markazli qilishga xizmat qiladi.

 Termiz davlat pedagogika institutida o‘tkazilgan konferensiya davomida mehmonlarning tantanali kutib olinishi, talabalarning badiiy chiqishlari va raqs namoyishlari tadbirga o‘ziga xos joziba bag‘ishladi.

 Konferensiyani institut rektori A. Xasanov ochib berdi. So‘ngra anjuman ishtirokchilari mavzuga oid ilmiy ma’ruzalar bilan qatnashishdi.

 Tadbir yakunida institut rahbariyati tomonidan faol ishtirokchilarga esdalik sovg‘alari topshirildi.

 Bunday ilmiy anjumanlar sohada yuz berayotgan yangiliklar, izlanishlar va muvaffaqiyatlarni muhokama qilish, shuningdek, xorijiy tillarni mutaxassislik fanlariga o‘qitish pedagogikasini yanada takomillashtirishga xizmat qiladi.