Bitiruvchi sinf o‘quvchilari “Eksperimental psixologiya” laboratoriyasida
2025-yil 29-oktabr kuni Termiz tumani 25-34-umumiy o‘rta ta’lim maktablarining bitiruvchi sinf o‘quvchilari Termiz davlat pedagogika instituti Amaliy psixologiya kafedrasi qoshida tashkil etilgan “Eksperimental psixologiya” laboratoriya xonasiga tashrif buyurishdi.
Tashrif davomida kafedra mudiri O.Eshmuradov laboratoriyaning maqsadi, vazifalari, faoliyati hamda imkoniyatlari haqida batafsil ma’lumot berdi. U laboratoriyada shaxsning hissiy, emotsional va irodaviy sohasi (jumladan, agressivlik, xulqidagi og‘ishish holatlari), individual xususiyatlari (temperament, qobiliyat, iqtidor, layoqat) hamda bilish jarayonlari (sezgi, idrok, xotira, diqqat, tafakkur)ni nazariy va amaliy jihatdan o‘rganish imkoniyati mavjudligini ta’kidladi.
Kafedra professor-o‘qituvchilari Sh.Normuminov va E.Mardonovlar tomonidan laboratoriyada mavjud zamonaviy jihozlar yordamida o‘quvchilarning psixik jarayonlarini aniqlashga qaratilgan kompyuterlashtirilgan psixologik testlar asosida tajribalar o‘tkazildi.
Uchrashuv davomida maktab o‘quvchilarning qiziqtirgan savollariga mutaxassislar tomonidan batafsil javoblar berildi. Mazkur tashrif o‘quvchilarda katta qiziqish uyg‘otdi va ularning psixologiya faniga bo‘lgan qiziqishlarini yanada oshirdi.