Termiz davlat pedagogika institutida respublika ilmiy-amaliy konferensiya bo‘lib o‘tdi

Termiz davlat pedagogika institutida O‘zbekiston Respublikasi Prezidentining “2022–2026-yillarga mo‘ljallangan Yangi O‘zbekistonning taraqqiyot strategiyasi to‘g‘risida”gi PF–60-son farmoni hamda Oliy ta’lim, fan va innovatsiyalar vazirligining 2024-yil 27-dekabrdagi 490-sonli buyrug‘i ijrosini ta’minlash maqsadida onlayn va offlayn tarzda “Boshlang‘ich ta’limni rivojlantirish muammolari va istiqbollari” mavzusida Respublika miqyosida ilmiy-amaliy konferensiya o‘tkazildi.

Konferensiyaning asosiy maqsadi — boshlang‘ich ta’limni rivojlantirish sohasida ilmiy-tadqiqot ishlari, ilg‘or tajribalar va innovatsion yondashuvlarni muhokama qilish, shuningdek, ta’lim jarayonida mavjud muammolarga yechim topish hamda rivojlanish istiqbollariga oid ilmiy va amaliy tajribalar bilan fikr almashishdan iboratdir.

Mazkur anjumanda mamlakatimizning turli oliy ta’lim muassasalaridan professor-o‘qituvchilar, ilmiy tadqiqotchilar hamda tajribali pedagoglar ishtirok etishdi. Tadbir davomida boshlang‘ich ta’lim tizimida uchrayotgan dolzarb masalalar, o‘quv jarayoniga innovatsion yondashuvlarni joriy etish, o‘qituvchilarning kasbiy mahoratini oshirish hamda ilg‘or xorijiy tajribalarni o‘rganish bo‘yicha takliflar bildirildi.

Konferensiya jarayonida qiziqarli ma’ruzalar tinglanib, amaliy takliflar ilgari surildi va ilmiy tajriba almashildi. Tadbir ilmiy muhit, yangi g‘oyalar va ijodiy fikrlar bilan boyitilib, barcha ishtirokchilarda katta taassurot qoldirdi.