Xorijiy til o‘qituvchilari uchun o‘quv-metodik seminar bo‘lib o‘tmoqda
Ayni damda Termiz shahridagi 26-maktabda xorijiy tillar fani o‘qituvchilari uchun navbatdagi amaliy seminar-trening bo‘lib o‘tmoqda. Tadbir Maktabgacha va maktab ta’limi vazirligining 2025-yil 15-sentabrdagi 340-sonli buyrug‘i ijrosini ta’minlash maqsadida tashkil etildi.
Seminar Surxondaryo viloyati Maktabgacha va maktab ta’limi boshqarmasi hamda Termiz davlat pedagogika instituti hamkorligida o‘tkazilyapti. Tadbirda xorijiy mutaxassislar, oliy ta’lim muassasalari professor-o‘qituvchilari va tajribali metodistlar ishtirok etishmoqda.
Seminar davomida xorijiy til o‘qituvchilarining kasbiy mahoratini oshirish, zamonaviy o‘qitish uslublarini amaliyotga joriy etish, xalqaro imtihonlarga (IELTS, CEFR, TestDaF, DELF, iTEP va TOEFL IBT) tayyorgarlik tizimini takomillashtirish masalalari muhokama qilinyapti.
Bu tashabbusning bosh maqsadi — xorijiy til o‘qituvchilarining malakasini oshirish, ta’lim sifati va samaradorligini yanada yuksaltirishdir.