“Xon atlas” – milliyligimiz ramzi
Termiz davlat pedagogika instituti Tillar fakultetida Xotin-qizlar maslahat kengashi hamda fakultet xotin-qizlar maslahat kengashi raislari tashabbusi bilan talaba-qizlar ishtirokida “Xon atlas” oyligi doirasida ma’naviy-ma’rifiy tadbir o‘tkazildi.
Tadbir davomida milliyligimiz ramzi hisoblangan xon atlas, shuningdek adras, shoyi kabi betakror milliy matolar keng targ‘ib qilindi. Talaba-qizlarimiz o‘zbekona nafislik timsoli bo‘lgan milliy liboslarda ishtirok etib, milliy matolarimizning jozibasi va ularning tarixiy ahamiyati haqida qiziqarli ma’lumotlarga ega bo‘ldilar.
Tadbirda milliy liboslar nafaqat tashqi go‘zallik, balki xalqimizning o‘ziga xos turmush tarzi, dunyoqarashi va ma’naviy qadriyatlarini mujassam etuvchi ulkan boylik ekanligi alohida ta’kidlandi.
Ushbu tadbirning asosiy maqsadi — milliy madaniyatimizning ajralmas qismi bo‘lgan xon atlas matosini keng targ‘ib qilish, yosh avlod qalbida milliy liboslarga mehr uyg‘otish, milliy urf-odatlarimizga hurmat va e’tiborni yanada oshirish, shuningdek, zamonaviy modada xon atlasning o‘rnini mustahkamlashdan iboratdir.