Vatanparvarlik

Joriy yilning 19-sentabr kuni

 Termiz davlat pedagogika instituti talaba-yoshlari Termiz shahrida joylashgan Surxondaryo viloyati Janubiy-g‘arbiy maxsus harbiy okrugi 11506-harbiy qismi bilan hamkorlikda tashkil etilgan “Yangi O‘zbekistonning xalqaro maydondagi davlatlararo hamkorligi – xalqimiz farovon hayotining asosi” nomli ma’naviy-ma’rifiy tadbirda faol ishtirok etdilar.

 Tadbir davomida yoshlarga mamlakatimizning so‘nggi yillardagi xalqaro maydondagi o‘rni, O‘zbekiston tashqi siyosatidagi ustuvor yo‘nalishlar, davlatimizning mintaqaviy va global darajadagi hamkorlikdagi faol pozitsiyasi haqida batafsil tushunchalar berildi. Shuningdek, O‘zbekistonning tinchliksevar siyosati, qo‘shni davlatlar bilan o‘zaro do‘stona aloqalarini mustahkamlash borasidagi sa’y-harakatlari ham yoritib berildi.

 Talabalar o‘z navbatida 11506-harbiy qism hududida joylashgan jangovar qurol-aslahalar, harbiy texnika vositalari, shuningdek, harbiy kutubxona va muzey faoliyati bilan yaqindan tanishdilar. Ekskursiya davomida harbiy xizmatchilarga yaratilgan sharoitlar, ularning xizmat jarayoni va kundalik faoliyatidagi mas’uliyatli jihatlar haqida ham qiziqarli ma’lumotlar berildi.

 Tadbir jarayonida talaba-yoshlar harbiylar bilan samimiy suhbatlar o‘tkazib, ularning xizmatdagi tajribalari, Vatan himoyasi yo‘lidagi fidoyiligi hamda sharafli burchlari haqida eshitdilar. Bu esa yoshlarda Vatanga muhabbat, milliy armiyamizga ishonch va hurmat tuyg‘ularini yanada kuchaytirdi.

 Mazkur ekskursiyadan ko‘zlangan asosiy maqsad – o‘sib kelayotgan yosh avlodni vatanparvarlik, yurtga sadoqat va fidoyilik ruhida tarbiyalash, shuningdek, ularda O‘zbekiston Qurolli Kuchlariga nisbatan faxr va g‘urur hissini uyg‘otishdan iboratdir.

 Tadbir yakunida talabalar bu kabi uchrashuv va ma’naviy-ma’rifiy ekskursiyalar ularni yanada ongli, fidoyi hamda kelajakka qat’iyat bilan intiluvchi shaxslar sifatida shakllantirishda muhim ahamiyat kasb etishini ta’kidladilar.