“Xon atlas” oyligi doirasida ma’naviy-ma’rifiy tadbir

Termiz davlat pedagogika instituti Maktabgacha va Boshlang‘ich ta’lim fakultetida Xotin-qizlar maslahat kengashi va fakultet xotin-qizlar maslahat kengashi raislari tashabbusi bilan talaba-qizlar ishtirokida “Xon atlas” oyligi doirasida ma’naviy-ma’rifiy tadbir va seminar mashg‘uloti tashkil etildi.

 Tadbirning asosiy maqsadi — talaba-qizlarni milliy qadriyatlarimiz ruhida tarbiyalash, ularning estetik didini oshirish va milliy liboslarimizning tarixiy, ma’naviy ahamiyatini keng targ‘ib etishdan iborat bo‘ldi.

  Dastur davomida milliyligimiz ramzi – xon atlas, shuningdek, adras, shoyi kabi milliy matolardan tikilgan liboslar namoyish etildi. Talabalar milliy liboslarning yaratilish tarixi, ularning xalqimiz turmush tarzida tutgan o‘rni va qadriyatlarimizni ifodalovchi ramziy ahamiyati haqida batafsil ma’lumotlarga ega bo‘ldilar.

  Tadbirda ishtirok etgan talaba-qizlar o‘zbekona nafislik va go‘zallik timsoli bo‘lgan milliy kiyimlarni namoyish etib, milliy urf-odatlarimiz va an’analarimizni ulug‘lashda faol qatnashdilar.

  Mazkur ma’naviy-ma’rifiy tadbir yoshlarda milliylik, o‘zlikni anglash, qadriyatlarga hurmat va sadoqat tuyg‘ularini kuchaytiribgina qolmay, ularning dunyoqarashi va madaniy saviyasini yanada boyitishga xizmat qildi.