Bayram tabrigi
Vatan uchun, millat uchun, xalq uchun!
Qadrli vatandoshlar!
Muhtaram hamkasblar!
Aziz talaba-yoshlar!
Siz, azizlarni yurtimiz tarixidagi eng ulug‘ va eng aziz sanalardan biri – O‘zbekiston Respublikasi davlat Mustaqilligining 34 yillik bayrami bilan chin qalbimdan samimiy muborakbod etaman!
Mustaqillik – bu xalqimizning asriy orzusi, ajdodlarimizning ezgu intilishlari, millatimiz g‘ururi va or-nomusi ifodasidir. Aynan mustaqillik tufayli biz o‘zligimizni angladik, qadriyatlarimizni asrab-avayladik, milliy manfaatlarimizni himoya qiladigan mustahkam taraqqiyot yo‘liga chiqdik.
Bugun Yangi O‘zbekistonning bunyodkorlik yo‘lidagi islohotlari, taraqqiyot va farovonlik sari intilishlari bevosita mustaqillik ne’mati bilan chambarchas bog‘liqdir. Shu sababdan ham bu bayram – nafaqat tarixiy sana, balki barchamiz uchun kelajakka ishonch, baxtli hayot va tinch-osoyishta kunlar timsolidir.
Aziz yoshlar! Sizlar mustaqilligimizning vorislari va davomchilari sifatida bilimli, tashabbuskor, vatanparvar bo‘lib voyaga yetishingiz – uchinchi Renessans sari dadil odimlayotgan yurtimiz kelajagi uchun eng katta boylik va ishonchdir.
Mustaqillikning shonli 34 yilligi barchangizning hayotingizga fayz-u baraka, qalbingizga faxr va g‘urur, faoliyatingizga esa yangi marralar bag‘ishlasin!
Hurmat bilan,
Azizbek Xasanov
Termiz davlat pedagogika instituti rektori